在工作上成日都會遇到好多講就天下無敵,做就有心無力嘅同事同上司。有時候不禁令自己覺得做到最好又有乜嘢用,因爲到最後被讚賞表揚同升職嘅未必係你。反而識得玩辦公室政治又或者擦老細鞋就步步高升,咁仲邊有動力啊。
工作真係好重要,因爲係訓覺以外花得最多時間嘅一個生活環節。正正因爲咁,所以你先要更加努力去做,就算蝕底都要做。點解?好簡單。你學到嘅將會比一般人多幾倍,亦代表你宜家嘅日子會好辛苦但往後嘅日子會舒服d,係先苦後甜。
咁簡單嘅道理點解無人做?主要原因有幾個:怕蝕底,怕辛苦…同懶。
d人嘅取態都係及時行樂,因爲這個時代有家人照顧,可以住屋企,唔需要結婚,簡單過活就得啦。自自然然產生一種懶性,無須特別上進,okay就得啦。
但成功嘅人往往就係不知不覺間,一步一步咁超越你。當佢成名之後你就以爲佢真係一夜成名,試問又點可能會呀!
所以你要成功,首先態度要認真,對人對事都要用心對待。你亦要懂得善用時間,分輕重,分先後。之後你會發現邊d係真心朋友,邊d成日話忙又唔覆。你要作出抉擇因爲你嘅時間都一樣咁寶貴。踏出你嘅 Comfort Zone,嘗試參與新嘅活動同接受新事物,你會發現同埋學到好多工作以外嘅知識,可以應用在唔同情況下幫你解決問題。
最後引用一段關於時間嘅寶貴係在於:
‘你可以給別人的最好的禮物是你的時間。因為給了時間,就等於給了你永遠拿不回來的一部分生命。’